Kyaddaki Sheikh Nuhu Muzaata Batte avuddemu omwasi lwaki yali tasobola kwetondera omuyimbi Eddy Kenzo wadde yekaabya obuziga bwa ggoonya.
Kinnajjukirwa nti Muzaata bwe yali ku mukolo Rema Namakula kwe yakyaliza bba, Dr. Hamza Sebunya ewa ssenga we, Sarah Nanteza e Naggulu, aliko ebigambo bye yayogera ng’alumba Kenzo.
Eyo Muzaata gye yasinziira okumulangira nga bw’ali ‘laavunniga’ ssemyekozo eyalemwa okuwasa ng’awoza mbu ayagala alinga nnyina, n’amulangira agende awase nnyina.
Teyakoma awo n’adda mu Juma ku Lwokutaano n’agamba nti n’empisa ze n’ennyambala ye ey’obuuma mu matu alinga omuseegu.
Oluvanyuma, Kenzo yatabukira Muzaata nti alina okumwetondera kuba kiswaza okumulangira okuwasa nnyina ate ng’akimanyi bulungi nti yafa dda emyaka egisukka 20.
Wabula Muzaata bwe yabadde ku mukolo gwa Rema olunnaku olw’eggulo yagambye nti, “Nze mpangudde entalo omuli World War kati newunya omuntu okulagira Muzaata okwetonda, hahaha nze siyinza kutya Walk to Work. Nze ndi muzadde naye kiswaza omuntu okuzannyira ku mwana wa munne. Rema weebale nnyo butanswaza abantu boogedde ebigambo kyokka ogaanye okubanukula“.
