Poliisi mu Kampala ekutte omusirikale ku by’okutta omutuuze ku kyalo Ssembuule Zone I, e Kabowa mu Divizoni y’e Rubaga enkya ya leero.
Assistant Superintendent of Police Justus Bwire, akulira Poliisi y’e Kironde yaakwatiddwa ku misango gy’okutta David Kibuuka.
Abatuuze bakedde kwekalakaasa nga bawakanya yinvesita munnansi wa Buyindi okubazibira ekkubo n’emyala egitambuza amazzi nga buli nkuba lwetonya, gakulukutira nju zaabwe.
Abatuuze bagamba nti Yinvesita mu kuzimba fakitole ye ekola ku bya firiigi emanyikiddwa nga Shreeji Stationers 2009, ekkubo yaliggala ssaako n’emyala.
Kigambibwa mu kwekalakaasa, Kibuuka asemberedde omusirikale Bwire okumutegeeza nti bekalakaasa mu ngeri y’emirembe kyokka omusirikale, amukubiddewo esasi ku mutwe, era agudde wansi naafirawo, ekitabudde abatuuze.
Wabula okusinzira kw’amyuka omwogezi wa Poliisi mu Kampala n’emirirwano Luke Owoyesigyire, omusirikale Bwire atwaliddwa ku kitebe kya Poliisi ekya Kampala mukadde ku misango gy’okutta omuntu era okunoonyereza kutandiise mu bwangu.
Kibuuka abadde muwandiisi w’oku kyalo, era okufa kwe kulese abatuuze nga batabukidde ekitongole ekya Poliisi ssaako n’okugirangira ebisongovu.
