Poliisi y’e Nakasongola ekutte abantu mukaaga (6) ku by’okutemula abantu bana (4) ku kyalo Wabigalo sabiti ewedde ku Lwokuna nga 5, December, 2019 ku luguudo oluva e Kampala – Gulu.
Omutemu yali akutte ejjambiya yatematema abantu 4 okuli Lozio Matovu (90), Judith Odur (38), Amos Sekanza (7) ne Mesearch Mawanda (10).
Wabula omwogezi wa Poliisi mu disitulikiti y’e Nakasongola, Patience Namara agambye nti Poliisi ekutte abantu mukaaga (6) babayambeko mu kunoonyereza kyokka agaanye okwatuukiriza amannya gaabwe kuba kiyinza okutaataganya okunoonyereza.
Mungeri y’emu agambye nti bakitegeddeko nti waliwo emmotoka etambuza abatemu ekika kya Premio namba UAY 525K era asabye abatuuze nti singa bagirabako, okutegeeza ku Poliisi.
Mungeri y’emu ekkiro ekikeseza olwaleero, waliwo abatuuze babiri (2) abattiddwa era ku Kitego mu ggombolola y’e Wabinyonyi e Nakasongola.
Abattiddwa kuliko Fred Bulega ne Fred Mujuni nga bonna batemeddwako emitwe era ebiwuduwudu bitwaliddwa mu ddwaaliro lye Nakasongola.
