Omulamuzi wa kkooti ku Buganda Road Stella Amabirizi agobye emisango egibadde givunaanibwa muyizi ku YMCA ettabi lye Jinja Brian Isiko.
Isiko abadde ku misango ebbiri (2) omuli okukozesa bubi kompyuta bwe yaweereza omubaka omukyala owe Kabarole Sylvia Rwabogo obugambo obujjudde omukwano ng’amukwana ku ssimu ye emirundi egiwerako mu ngeri y’okumutyoboola ekitiibwa kye.
Enkya ya leero Omulamuzi Amabirizi agobye emisango gyonna olw’omubaka Rwabogo okwebulankanya emirundi 7 nga talinya mu kkooti, okuwa obujjulizi.
Omulamuzi agambye nti omubaka Rwabogo obutagenda mu kkooti, kabonero akalaga nti omusango takyagwetaaga.
Oluvudde mu kkooti, Isiko abadde omusanyufu, asiimye omulamuzi okumugyako emisango nga mu kiseera kino waddembe okuddamu okutambuza emirimu gye nga talimu kutya kwonna.
Ate munnamateeka we Ramadhan Waiswa agambye nti bageenda kutuula ne Isiko okusalawo eky’okuzaako.
Isiko, yakwatibwa Poliisi y’oku Palamenti nga 29, Ogwokutaano, 2018 ku misango gy’okumalako omubaka Rwabogo eddembe lye bwe yali amusindikira obugambo ku ssimu ng’amukwana.
Kinnajjukirwa nti omulamuzi wa kkooti ku Buganda Road Gladys Kamasanyu, yali yasiba Isiko emyaka 2 n’emyezi 8 mu kusooka yali akirizza emisango kyokka oluvanyuma, yaddukira mu kkooti enkulu mu Kampala ng’awakanya eky’omulamuzi Kamasanyu okumusingisa omusango ate nga yali agyegaanye.
Omulamuzi wa kkooti enkulu Jane Francis Abodo yasazaamu ekibonerezo kwekulagira omusango okuddamu okuwulirwa mu maaso g’omulamuzi omulala era kwe kusindikibwa mu maaso g’omulamuzi Amabirizi, agubaddemu okutuusa olunnaku olwaleero.
