KABADI OBA! Bebe Cool asabye Poliisi okuyimbula abawagizi be abaamukuba obuccupa mu Konsati ya Cindy, alaze omutima gwa zzaabu

Bya Nalule Aminah

Kyaddaki Poliisi eyimbudde abantu abakwattiddwa mu kivvulu kya Cinderella Sanyu amanyikiddwa nga Cindy ekyabadde ku Cricket Oval e Lugogo, ekiro, ky’olunnaku Olwomukaaga.

Poliisi yakutte abantu 11 ku misango ku misango gy’okasuka obuccupa obwakubye Omuyimbi Moses Ssali amanyikiddwa nga Bebe Cool bwe yabadde ali ku siteegi.

Abaakwattiddwa kuliko Ssempala Juma, Otim Ashraf, Nasur Nyanzi, Kasule Herman, Kasim Ssemwogere, Lubaga Fahima, Jawad Jimmy, Muhwezi Gift, Habuyi Suleiman, Habimana Innocent ne Ndabangi Godwin ne batwalibwa ku Poliisi Jinja Road.

Okusinzira ku mwogezi wa Poliisi mu Kampala n’emirirwano Afande Patrick Onyango, abakwate babadde ku misango gy’okuba omuntu.

Wabula Onyango ategeezezza nti Bebe Cool akedde ku Poliisi y’e Jinja era bonna abaakwattiddwa, abasonyiwe emisango n’okusaba Poliisi okubayimbula.

SK OMUZINNYI