Abantu 5 baddusiddwa mu ddwaaliro nga bali mu mbeera mbi oluvanyuma lwa bbaasi ebadde ebatambuza okugwa kabenje ku kyalo Nakazi ku luguudo oluva e Kampala okudda e Gulu mu disitulikiti y’e Luweero.

Abatwaliddwa mu ddwaaliro kuliko Richard Obora, Michael Okello ne James Oloya okuva mu disitulikiti y’e Pader ate Betty Ajol ne Baker Okello batuuze mu disitulikiti y’e Lira.

Akabenje kavudde ku ddereeva Richard Gimei  abadde avuga bbaasi okuva mu kampuni ya ‘Real Bus’ namba UAM 834Y okulemererwa ku ssaawa nga 10 ez’ekiro ku kyalo Nakazi mu katawuni k’e Luweero.

Okusinzira ku mwogezi wa Poliisi mu bitundu bye Savannah, Isah Semwogerere, waliwo Tuleera ebadde eva Gulu okudda e Kampala ekubye amataala mu ddereeva wa bbaasi nemulemesa okulaba, ekivuddeko bbaasi okugikuba ekigwo.

Abantu 5 baddusiddwa mu ddwaaliro e Luweero nga bali mu mbeera mbi ate abasukka 40  bakebeddwa nga bali mu mbeera nungi.

Poliisi etandiise okunoonyereza okuzuula ekituufu ekivuddeko akabenje.