Poliisi ekutte ssemaka  William Obote ku bya mutabani we okuttibwa ali mu gy’obukulu 11 ku kyalo Bung mu disitulikiti y’e Dokolo.

Omulambo gwa Robert Leny, gwasangiddwa mu nimiro mita 200 okuva awaka olunnaku olw’eggulo ku Ssande ku Makya.

Taata Obote agamba nti mutabani we yabuzibwawo akawungeezi k’olunnaku Olwomukaaga okutuusa lwe yasangiddwa ng’attiddwa olunnaku olw’eggulo.

Ssentebbe w’ekyalo Lujino Omara, agamba nti Obote abadde abeera ne mutabani we oluvanyuma lwa mukyala we okufa era asabye Poliisi okunoonyereza ekyaviriddeko omwana okuttibwa.

Ate addumira Poliisi mu disitulikiti y’e Dokolo Alfred Baluku, agambye nti Ssemaka Obote akwattiddwa kuba yalemeddwa okutegeeza ku Poliisi ku kya mutabani we okubuzibwawo, okutuusa lwe yazuuliddwa ng’attiddwa.