Abantu babiri (2) bali maziga mu ddwaaliro ekkulu e Hoima nga baakubiddwa Poliisi amasasi, akawungeezi k’olunnaku olw’eggulo.

Abaakubiddwa kuliko Lampard Owinji myaka 26 n’omwana Denis Baraka myaka 11 nga bona batuuze ku kyalo Rwengabi mu ggombolola y’e Kabwoya mu disitulikiti y’e Kikuube nga Owinji yakubiddwa ku mukono ne mu lubuto ate omwana Baraka yakubiddwa mugongo.

Okusinzira ku batuuze, Poliisi bwe yabadde etaasa omukyala Fracini Akumu omu ku batuuze obutattibwa, gwe bagamba nti asukkiridde obulogo, amasasi agaakubiddwa okubagumbulula, gaakutte abatuuze baabwe.

Poliisi okuva e Kaseeta yeyayitiddwa okutaasa embeera era weyatuukidde ng’omukyala Akumu akubiddwa nnyo ali mu mbeera mbi.

Omwogezi wa Poliisi mu bitundu bye Albertine Julius Hakiza, alabudde abatuuze okukomya okutwalira amateeka mu ngalo era asuubiza okunoonyereza okuzuula ekyavuddeko abasirikale okulumya abamu ku batuuze.