Abalwadde mu ddwaaliro ekkulu e Mbale badduse mu ddwaaliro nga kivudde ku Ssenyiga we China, Covid-19 okutuuka mu ggwanga.
Uganda mu kiseera kino erina abalwadde 33 era abatuuze e Mbale bagamba nti Coronavirus olwatuuka mu ggwanga, abasawo ne basuulawo emirimu gyabwe.
Abasawo okuteeka wansi ebikola, kivuddeko abalwadde okudduka mu ddwaaliro omuli n’abo abaali ku bitanda.
Abatuuze okuli Sarah Muyama Balikowa ne Asuman Wamboga bagamba nti abalwadde badduka mu ddwaaliro olw’okutya, okufa olw’obutafuna bujanjabi.
Mungeri y’emu bagamba nti n’omukulembeze w’eggwanga Yoweri Kaguta Museveni okuyimiriza entambula y’olukale n’okusingira ddala Takisi ne bodaboda kyongedde okulemesa abalwadde, okuddukira mu ddwaaliro ekifudde eddwaaliro ekkalu nga temuli balwadde.
Ku nsonga eyo, omu ku bayizi abasaangiddwa ku ddwaaliro omu ku bali mu kuyigirizibwa obwa Dokita (medical intern) agambye nti abasawo baayimiriza emirimu gyabwe olw’obutaba na byetaagisa omuli giravuzi ne masiki okutambuza emirimu gyabwe ssaako n’abo okwekuuma.
