Gen. David Muhoozi omuduumizi wa UPDF mu ggwanga alaze nti ategeera omuntu wa wansi wadde y’omu ku basiinga ekitiibwa mu ggwanga.
Olunnaku olwaleero, Gen. Muhoozi asisinkanye abakyala basatu (3) abaakubwa emiggo sabiti ewedde mu Kampala, Poliisi n’eggye erikuuma ebyalo aba Local Defence Unit (LDU) bwe baali bagumbulula abantu mu Kampala sabiti ewedde ku Lwokuna.
Poliisi ne LDU baali bateeka mu nkola ekiragiro ky’omukulembeze w’eggwanga lino Yoweri Kaguta Museveni eky’obutakirizza bantu kweyambisa entambula y’olukale wadde abasuubuzi okutunda ebintu mu butale ebitali mmere, ng’emu ku ngeri y’okutangira ‘Coronavirus’ okusasaana.
Abakyala 3 abaakubwa emiggo, baasangibwa mu Kampala okumpi ne ppaaka enkadde era baali batunda ebintu omuli emiyembe n’emichungwa.
Ku lw’ekitongole kya LDU, Gen. Muhoozi asabye okumusonyiwa era asuubiza okulongoosa mu ntambuza y’emirimu era alagidde abakyala bonna okufuna obujanjabi mu ddwaaliro ly’amaggye e Mbuya n’okubakwasizaako mu ntambuza y’emirimu gyabwe.
Mungeri y’emu, Gen. Muhoozi akoze enkyukakyuka mu bukulembeze bwa LDU mu Kampala era alonze Col Mike Walaka Hyeroba okuduumira LDU mu Kampala n’emirirwano, okusobola okulongoosa entambuza y’emirimu.
