Poliisi ekutte omutabani ku by’okutta kitaawe olw’obutakaanya ku ttaka era engeri gy’attiddwaamu erese abatuuze nga bali mu ntiisa.
Muramuzi Emmanuel amanyikiddwa nga Dickson myaka 22 yakwattiddwa ku by’okutta kitaawe Fred Magezi myaka 52 abadde omutuuze ku kyalo Mwendo mu ggombolola y’e Kitumba mu disitulikiti y’e Kabale.
Omulambo gwa Magezi gusangiddwa okumpi n’amaka ge nga gusaliddwako ennyindo wakati mu kitaba ky’omusaayi ssaako n’eggaali ye.
Abatuuze bekengedde, nga basinzira ku musaayi ogwazze gutonya okuva ku makaage okutuusa omulambo we gwasuuliddwa era amangu ddala omutabani Muramuzi akwattiddwa.
Ku Poliisi, Muramuzi agambye nti yasse kitaawe kuba abadde amulemeseza okutunda ettaka, okufuna ssente okutambuza emirimu gye.
Mungeri y’emu awadde abasirikale enseko, bw’ategezezza nti kitaawe asemberedde okufa olw’emyaka gye ate agaana okutunda ettaka.
Okusinzira ku mwogezi wa Poliisi mu bitundu bye Kigezi Elly Maate, omwana akwattiddwa ku misango gy’obutemu era essaawa yonna bamutwala mu kkooti.
