Poliisi etandiise okunoonyereza ku basajja babiri (2) abasaangiddwa nga bafiiridde mu mmotoka ku luguudo lwe Bukulula-Kalungu ku kyalo Kyambala mu ggombolola y’e Bukulula mu disitulikiti y’e Kalungu.
Emirambo gisangiddwa mu mmotoka eyakazibwako ‘saloon car’ namba UAY 873M era esaangiddwa ng’epakingiddwa ebbaali w’ekkubo.
Abatuuze bagamba nti emmotoka, yapaakinga mu kifo mwesangiddwa, akawungeezi k’olunnaku olwa Ssande okutuusa omu ku batuuze akedde enkya ya leero, okuddamu okugisanga mu kifo kye kimu nga yonna etandiise okuvaamu ekivundu ssaako n’ enswera okugyetoloola.
Amangu ddala ssentebbe w’ekyalo ayitiddwa era akubidde Poliisi essimu.
Okusinzira kw’addumira Poliisi y’e Kalungu, Charles Okello, emirambo gitwaliddwa mu ddwaaliro e Masaka okwekebejjebwa.
DPC Okello agamba nti omulambo ogumu gusangiddwako ekiwundu eky’amaanyi ku mutwe ete omulala kigambibwa yatugiddwa.
