Ekitongole kya Poliisi n’amaggye, kivuddeyo okangavula abasirikale bonna abegumbulidde okutyoboola eddembe kya bannayuganda mu kiseera kino eky’okuteeka mu nkola ebiragiro bya Pulezidenti Yoweri Kaguta Museveni, okutangira Corona Virus okusasaana.
Waliwo abasirikale ababadde batwalira amateeka mu ngalo okutimpula abantu emiggo mu kiseera kya Kafyu nga bayambibwako amaggye mu bitundu by’eggwanga eby’enjawulo, nga bannansi bakaaba.
Wabula abasirikale 10 bakwattiddwa omuli ASP Richard Balenzi, Sgt. Musaasizi Charles, Cpl. Odong Joseph, PC Opado Moses, PC Opio Augustine, PC Okello Bosco, PC Okello Jimmy, PC Ssentamu Richard, PC Byamukama G, PC Funga Nelson ne PC Busingye Ronald era bali ku misango gya kutulugunya bannansi.
Ne UPDF ekutte bannamaggye mukaaga (6) L/Cpl. Awany Abori Constantine, Pte Makanga Mohammed, Pte Eboku John Mark, Pte Mutenge Robert, Pte Ayo Silvestre ne Pte Ahimbisibwe Eria era olunnaku olw’enkya ku Lwokubiri batwalibwa mu kkooti y’amaggye era ku misango gya kutulugunya bannansi.
Okusinzira ku mwogezi wa Poliisi mu ggwanga Fred Enanga, ebikolwa by’abasirikale ebimu bigendereddwamu okuttattana eggwanga n’erinnya ly’ekitongole ekya Poliisi.
