Poliisi erangiridde nti ppikipiki zonna ezikwatibwa mu kiseera kino, tebagenda kuzidiza bannanyinizo okutuusa nga ‘Corona Virus’ awedde mu ggwanga.
Okusinzira ku mwogezi wa Poliisi mu ggwanga Fred Enanga, olunnaku olw’eggulo Poliisi yakutte ppikipiki eziwerako olw’okusangibwa nga ziri ku makkubo, okusukka essaawa 8 ez’amalya g’ekyemisana.
Enanga agamba nti omukulembeze w’eggwanga Yoweri Kaguta Museveni yalagidde bodaboda okusigala nga zikola omuli okutambuza emmere okuva ku makya okutuusa ssaawa 8 kyokka tezikirizibwa kutambuza bantu.
Agamba nti olunnaku olw’eggulo, bodaboda ezasaangiddwa nga ziri ku makkubo okusukka essaawa 8 zaakwatiddwa era baakutte ezisukka mu 200.
Enanga agamba nti mu bitundu bye Ntebbe, Makindye, Kansanga baakutteyo ppikipiki 119, ate mu bitundu bye Kawempe, Maganjo, Kasangati 84.
Mu bitundu bye Jinja Road baakutteyo ppikipiki 83 ssaako n’ebitundu ebirala.
Mu kwogerako eri bannamawulire ku Media Centre mu Kampala enkya ya leero, agambye nti ppikipiki tebagenda kuzidiza bannanyinizo mu kiseera kino ekya Kolona kuba bayinza okuddamu okumenya amateeka.
Uganda mu kiseera kino abalwadde 53 aba Covid-19
