Bya Nalule Aminah
Entiisa ebutikidde abatuuze mu zzooni y’e Katooke mu ggombolola y’e Nabweru mu disitulikiti y’e Wakiso, abaana 2 webagudde mu kinnya kya kabuyonjo emisana ga leero.
Okusinzira ku mwogezi wa Poliisi mu Kampala n’emirirwano Patrick Onyango, Poliisi efunye essimu okuva ku munnamawulire w’ekyalo Luyima Herbert era wetuukidde ng’abaana bamaze okufa.
Abaana abafudde kuliko Kavuma Frank ali mu gy’obukulu 19 ng’abadde mu luwumula lwa S6 ne Mulangira Mark myaka 23.
Onyango agamba nti omu ku baana asudde ebisumuluzo mu kabuyonjo eri mu Mita 30 era abadde agezaako okubigyayo nasereera nagwamu ne muganda we abadde agezaako okusikayo munne, naye nagwamu.
Emirambo, gitwaliddwa mu ggwanika ly’eddwaaliro ekkulu e Mulago okwekebejjebwa ate ekyembi n’abazadde nga bakulembeddwamu ssemaka Kalule Sulaiman ne mukyala we bazirise era batwaliddwa mu kalwaliro aka Victoria clinic mu zzooni y’e Katooke nga bali mu mbeera mbi.
Onyango agamba nti Poliisi etandiise okunoonyereza ku nsonga eyo.
