Omusirikale w’ekitongole ekikessi ekya Iso Stephen Osikol Ariong asindikiddwa ku limanda mu kkomera e Luzira ku misango gy’okutunda sitiika z’emmotoka ezikiriza abantu okutambula n’emmotoka zaabwe mu kiseera kino ekya Kalantini.
Ariong asimbiddwa mu maaso g’omulamuzi Dorothy Bagyenyi ne banne okuli Abapakistan basatu okuli Ali Sabiri akulira wooteeri ya Alibaba esangibwa e Ntinda, Ali Noshad dayirekita wa kkampuni etunda emmotoka eya Jambo Auto Motors ne Imram Usama Behlum owa kkampuni ya JP Africa Jambo.
Mu kkooti, bonna bakkiriza emisango era baasindikidwa mu kkomera e Kitalya okutuusa nga May 8, 2020 lwe banaakomezebwawo mu kkooti okuweebwa ekibonerezo.
Ariong yaweerezebwa mu minisitule y’ebyentambula okuva mu ISO olw’obukugu bwe okuyambako abakungu mu ministule eno okusunsula abantu abakola emirimu egitalekeka abalina okufuna sitiika okusigala nga bakola emirimu omuli abasawo, bannamawulire n’abalala kyokka yadda mu kuziwa bagwiira abakola omulimu gw’okutunda emmotoka ku ssente wakati 150,000 – 300,000 era omusango agukirizza.
