Abatuuze ku mwalo kye Mulungu ssaako n’abasuubuzi, e Munyonyo mu ggombolola y’e Makindye embeera gye balimu bagikwasizza Omutonzi, olwa mazzi okubazingako nga kivudde ku Lake Victoria okubooga.
Mulungu, abasuubuzi bazimbawo obuyumba nga bwa mbawo, okutundiramu ebyenyanja ssaako n’omwenge kyokka mu kiseera kino bujjudde amazzi nga n’abasuubuzi, tebakyasobola kubaakomu kyebakoleramu.
Wabula Mukasa Nabaweesi, akulembera Omuluka gwa Mutuba Gumu omusangibwa omwalo gwe Mulungu, agamba nti ku mulungi guno amazzi gasukkiridde obungi era bangi ku basuubuzi, badduka dda okudda mu byalo ate abasinga tebakyakola era boolekedde okufiira mu nnyumba olw’enjala.
Mungeri y’emu agambye nti ennyanja okubooga buli mwaka kibadde kibeerawo okuva mu 1982 kyokka ku mulundi guno kisukkiridde, ekiviiriddeko n’abasuubuzi okusenguka.
Ate omu ku batuuze b’e Mulungu Ssalongo Mutebi, agamba nti amazzi singa geeyongera n’ebyenyanja byeyongera okubula, era embeera esukkiridde okubanyigiriza.
Ku nsonga y’e Mulungu, David Kureeba omu ku bakozi mu kitongole ekikuuma obutonde bw’ensi ekya National Association of Professional Environmentalist-NAPE, agamba nti abantu okusenga ku mbalama y’emu ku nsonga lwaki amazzi, gabayingiridde.
