Omulamuzi wa kkooti e Mityana Elias Kakooza agaanye okusomera omubaka wa Monisipaali y’e Mityana Francis Zaake emisango olw’embeera gyabaddemu.
Zaake bamuggye mu ddwaaliro e Naguru ng’ali ku kitanda era mu kkooti e Mityana, batuseeyo ku ssaawa 7 ez’emisana nga Poliisi emutwalidde mu Ambulensi.
Mu kkooti, omulamuzi Kakooza amutunuulidde ng’ali mu mbeera mbi ssaako n’okumwekeneenya ng’ali mu bulumi, kwekulagira Poliisi okumutwala mu ddwaaliro.
Omulamuzi agaanye okusomera Zaake omusango gwonna olw’embeera ye gyabaddemu.
Okusinzira ku mwogezi w’ekitongole ekiramuzi Solomon Muyita, Zaake yetaaga okufuna obujanjabi, okumutwala mu kkooti ng’asobola bulungi okwewozaako n’okutegeera ebigenda mu maaso mu kkooti.
Okusinzira ku ludda oluwaabi, nga 19, omwezi guno Ogwokuna, 2020, Zaake yakwattibwa okuva makaage ku kyalo ku kyalo Buswabulongo, Mityana ebitongole ebikuuma ddembe okwali Poliisi n’amaggye oluvanyuma lw’okugabira abantu emmere mu konsituwensi ye.
Oluvanyuma lw’okukwattibwa, yaggulwako emisango 3 omuli okugyemera ebiragiro by’omukulembeze w’eggwanga eby’okuyimiriza abantu bonna okugabira abantu emmere kuba kiyinza okusasaanya ekirwadde kya Covid-19.
Emisango emirala kuliko okugezaako okutta abantu n’obulagajjavu obuyinza okuvaako okusasaanya obulwadde mu bantu.
Nga bannamateeka ba Zaake bakedde ku kooti ye Nakawa, ebitongole ebikuuma ddembe, bikedde kumutwala mu kkooti y’e Mityana.
Mu kkooti e Nakawa n’omulamuzi Ruth Nabasa naye abadde alagidde Gavumenti ssaako n’ebitongole byokwerinda nga bikulembeddwamu Poliisi, okuyimbula Zaake oba okumutwala mu kkooti.
Omulamuzi okuwa ensala ye, kidiridde bannamateeka ba Zaake nga bakulembeddwamu Abdallah Kiwanuka ne Aron Kiiza okuddukira mu kkooti, Poliisi okusibira Zaake mu kaduukulu okusukka essaawa 48 awatali kumutwala mu kkooti.
Munnamateeka Kiwanuka asekeredde ekya Gavumenti okuddusa Zaake mu Kkooti y’e Mityana, oluvanyuma lw’okulaba nti bagitutte mu mbuga z’amateeka.
Wabula okusinzira ku kiwandiko ekivudde mu kkooti e Mityana, Zaake aguddwako agguddwako emisango ebiri okuli omuli okusaasanya ekirwadde ki COVID- 19 n’okujjemeera ebiragiro bya Pulezidenti Museveni.
