Poliisi e Iganga ekutte omukyala ku by’okutta bba.
Omukyala Shamim Nabirye nga mutuuze ku kyalo Mutambala mu disitulikiti y’e Iganga yakwattiddwa ku by’okutta kabiite we Emmanuel Bagoole abadde omusomesa ku Canon Ibra primary school mu ggombolola y’e Bulamagi.
Omulambo gwa Bagole, gulabiddwa abatuuze okumpi n’oluguudo lw’eggaali y’omuka ku kyalo Nampirika nga yafumitiddwa mu kifuba emirundi egisukka mwe 3.
Okusinzira ku Muzamilu Matende ssentebbe w’ekyalo Nampirika B, Poliisi esukkiridde obulagajjavu mu ssaawa za Kafyu, ekivudde abantu abakyamu, okweyongera mu kitundu kyabwe.
Ate addumira Poliisi mu bitundu bye Iganga David Ndaula, agambye nti waliwo abantu abakyalira ku nsiko ku misango gy’obutemu era agumizza abatuuze okubanoonya bonna bakwattibwe wadde Omulambo guweereddwa ab’enganda okuziikibwa.
Abamu ku batuuze bagamba nti Omugenzi n’omukyala baludde nga balina obutakaanya ku nsonga z’omu kisenge ng’omukyala alumirizza bba okwebakira mu kaboozi kyokka ng’amulemesa okunoonya omusajja, ayinza okumunazaako ennaku y’omukwano.
