Ekitongole kya poliisi ekinoonyereza ku buzzi bw’emisango (CID) nga kiri wamu n’ab’ekitongole kya Pulezidenti ekirwanyisa obulyake ekya State House Anti- Corruption Unit bakutte abasirikale basatu (3) ku misango gy’okutta omuntu n’okuvuluga omusango.
Okusinzira ku mwogezi wa Poliisi mu Kampala n’emirirwano Superintendent of Police –SP Patrick Onyango, abakwate bali ku misango gy’okutta Vincent Serungi omutuuze we Kisimbiri mu Tawuni Kanso y’e Wakiso mu disitulikiti y’e Wakiso.
Onyango agamba nti abasirikale abakwattiddwa kuliko Assistant Superintendent of Police – ASP Patrick Mugume akulira Poliisi y’e Kisimbiri n’abalala okuli Constable Isaac Kabosi ne Constable Stephen Wafula.
Kigambibwa Serungi yali abbanja Constable Kabosi ssente ze oluvanyuma lw’okweyambisa Ppikipiki ye.
Constable Kabosi yakozesa obuyinza bw’emmundu kuba musirikale okuteeka Serungi ku ttaka era oluvanyuma Constable Wafula yayitibwa okutawulula ensonga.
Abatuuze baali bavudde mu mbeera nga baagala kukuba Constable Kabosi kyoka oluvanyuma lwa Constable Wafula okutuuka, yakuba Serungi essasi eryamutta nga 31/March/2020.
Onyango agamba nti omusango gwatwalibwa ku Poliisi y’e Kisimbiri kyokka ASP Mugume talina kyeyakolawo era y’emu ku nsonga lwaki bakwattiddwa.
