Abatuuze ku kyalo Kabukunge mu disitulikiti y’e Kalungu batabukidde Poliisi mu kitundu kyabwe, okunyonyola ku ngeri mutuuze munaabwe gye yafiiridde mu kaduukulu ka Poliisi.
Abdul Kaweesi ,40 abadde mutuuze ku kyalo Kabukungu mu Tawuni Kanso y’e Kalungu yasaangiddwa ng’afiiiridde mu kaduukulu ka Poliisi sabiti ewedde ku Lwomukaaga oluvanyuma lw’okukwatibwa nga tayambadde Masiki.
Abatuuze bagamba nti Kaweesi yakubiddwa ng’ali mu kaduukulu ekyavuddeko okufa kwe newankubadde Poliisi yeebuzabuza.
Margaret Nantabiro ssenga w’omugenzi, asabye Omuduumizi wa Poliisi mu ggwanga Martin Okoth Ochola okuyingira mu nsonga zaabwe, okunoonyereza ekyavuddeko omuntu waabwe okufa.
Wabula addumira Poliisi mu disitulikiti y’e Kalungu (DPC) Charles Okello agambye nti Kaweesi yetugira mu kaduukulu ka Poliisi, awatali nsonga emanyikiddwa.
DPC Okello agamba nti alipoota y’abasawo ku ddwaaliro e Masaka, ekakasa nti Kaweesi yafudde olw’okwetuga wabula Poliisi ekutte abasirikale bonna abali bakuuma akaduukulu mu kiseera weyafiira.
