Entiisa ebuutikidde abatuuze mu zzooni y’omu Mbawo e Nateete mu Divizoni y’e Rubaga, mutuuze munaabwe Sarah Kamwaka myaka 40 bwattiddwa mu ngeri y’obukambwe.
Kamwaka abadde mu bbaala era ku ssaawa nga 5 ez’okumakya, omusajja Kalegeya Abdul nga musazi wa nviiri, amulumbye namukuba namutta, omulambo naguteekera omuliro.
Kalegeya oluvanyuma lw’okutta omukyala Kamwaka, ayagadde okwetta era yekumyeko omuliro kyokka tafudde era atwaliddwa mu ddwaaliro Kiruddu ng’ali mu mbeera mbi.
Okusinzira kw’amyuka omwogezi wa Poliisi mu Kampala n’emirirwano Luke Owoyesigyire, Omulambo gutwaliddwa mu ddwaaliro e Mulago okwekebejjebwa ate omusajja Kalegeya wadde ali mu ddwaaliro, aguddwako emisango 2 omuli ogw’obutemu n’okugezaako okwetta.
Poliisi egamba nti okunoonyereza kulaga nti omukyala Kamwaka kati omugenzi okugaana okuganza Kalegeya y’emu ku nsonga lwaki amusse, okumulemesa abasajja abalala abamwegwanyiza.
Eddoboozi lya Luke
