Munnamaggye wa UPDF ali ku ddaala lya ‘Sergeant’ attiddwa era omulambo gwe gulabiddwa abatuuze enkya ya leero.

Omulambo gwa Sergeant Samson Emoding gusangiddwa mu kitaba ky’omusaayi mu Tawuni Kanso y’e Magamaga mu disitulikiti y’e Mayuge nga gusuuliddwa ku luguudo lw’eggaali y’omukka.

Sergeant Samson abadde yinginiya era omulambo gwe gubaddeko ebiwundu ebyamaanyi ku mikono, omutwe n’ekifuba era abatuuze bazudde omusaayi omungi mu mita 100  okumpi n’awazuuliddwa omulambo.

Abatuuze nga bakulembeddwamu Solomon Ndimulodi bagamba nti Sergeant Samson baakomye okumulabako akawungeezi k’olunnaku olw’eggulo.

Wabula George Musinguzi, omwogezi wa UPDF mu bitundu bya Busoga agamba nti okunoonyereza kutandikiddewo okuzuula abatemu n’ekigendererwa kyabwe.

Poliisi esobodde okugyawo omulambo era gutwaliddwa mu ddwaaliro ekkulu e Mayuge okwekebejjebwa.

Sergeant Samson ye munnamaggye owokubiri okuttibwa, nasuulibwa mu kifo kye kimu, oluvanyuma lw’abatuuze okuzuula omulambo gwa Joel Cherukut mu Desemba wa 2019.