Poliisi ekutte abantu babiri (2) ku by’okutta munnamaggye wa UPDF Sergeant Samson Emoding abadde akolera mu nkambi ye Magamaga.
Omulambo gwa Sergeant Samson gwalabiddwa abatuuze mu kitaba ky’omusaayi mu Tawuni Kanso y’e Magamaga mu disitulikiti y’e Mayuge nga gusuuliddwa ku luguudo lw’eggaali y’omukka ku makya g’olunnaku olwa Mmande nga 1, June, 2020.
Sergeant Samson yabadde yinginiya era omulambo gwe gwabaddeko ebiwundu ebyamaanyi ku mikono, omutwe ssaako n’ekifuba.
Okunoonyereza kulaga nti Sergeant Samson yattibwa oluvanyuma ne bamunyoola ensingo okubuzabuza obujulizi.
Wabula omwogezi wa UPDF mu bitundu bye Busoga, George Musinguzi agambye nti bakutte abantu 2 abateeberezebwa okwenyigira mu kutta Sergeant Samson, okubayambako mu kunoonyereza wadde agaanye okwatuukiriza amaanya gaabwe.
Abakwattiddwa kuliko munnamaggye omu n’omuntu wabuligyo omu.
Eddoboozi lya Musinguzi
Ate James Mubi, omwogezi wa Poliisi mu bitundu bye Busoga East, agamba nti Poliisi ekyanoonya abantu abalala abaliira ku nsiko mu kiseera kino, abagambibwa okwenyigira mu ttemu.
Mungeri y’emu agumizza abatuuze, ku nsonga y’ebyokwerinda.
