Poliisi erinnye eggere mu lukiiko lw’abasuubuzi mu katale St. Balikuddembe akamanyiddwa nga Owino.
Abasuubuzi abatunda engoye enkadde ezimanyiddwa ng’emivumba, baayise olukiiko nga bakulembeddwamu ssentebbe waabwe Godfrey Kayongo okuteesa ku ngeri Gavumenti gy’eyinza okubakkiriza okudda ku mirimu.
Abasuubuzi abo, bagamba nti beewunyiza omukulembeze w’eggwanga Yoweri Kaguta Museveni okubalemesa okudda ku mirimu ate nga yakkirizza Takisi okuddamu okutambuza abantu olunnaku olw’enkya ku Lwokuna ssaako ne Mall okuggulawo.
Abamu bakulukusizza amaziga, nga bagamba nti embeera eyongedde okubanyigiriza nga bangi ku bo bakola mmere ya leero.
Abasuubuzi
Wakati nga bakyateesa omuli abatunda engoye enkadde, ensawo, engatto n’abalala, amyuka addumira Poliisi ya Kampala mukadde Edrisa Kyeyune abalagidde okuyimiriza kuba olukiiko lukubiddwa mu ngeri emenya amateeka.
Luke Owesigyire amyuka omwogezi wa Poliisi mu Kampala, okutangira Kolona okusasaana y’emu ku nsonga lwaki bayimiriziddwa.
