Poliisi eri mu kunoonya omutemu eyasse omuwala Amiina Mutesi myaka 25 ku ssaawa 4 ez’ekiro, ekikeseza olunaku lwa leero.
Mutesi, omutemu atamanyiddwa yamusangiriza mu kkubo, bwe yabadde ava okukyalira mukwano gwe Amiina Babirye ku kyalo Danida mu ggombolola y’e Walukuba-Masese mu disitulikiti y’e Jinja era omutemu yamutuunze ekiso ku nsingo.
Mutesi yafudde bakamutuusa mu ddwaaliro erya Danida Health Centre II.
Omu ku batuuze abasobodde okutwala Mutesi mu ddwaaliro, nga basuubira nti bayinza okutaasa obulamu Philemon Kudera, agamba nti Poliisi yasobodde okwanguwa okunoonya omutemu wabula nga yadduse dda.
Abby Ngako, omwogezi wa Poliisi mu bitundu bye Kiira, agambye nti omulambo gukwasiddwa eddwaaliro ekkulu e Jinja okwekebejjebwa nga ne Poliisi bwenoonya omutemu.
