Omukyala Jennipher Ajambo myaka 30 asimatuse okuttibwa, bba Robert Masinde bw’amutemyetemye ebiso olw’obutakaanya awaka ku kyalo Kamira mu disitulikiti y’e Luweero.
Ajambo yakazaalira bba abaana 6 kyokka kigambibwa nti abadde alemesa bba, okuddamu okukwata ku sseemateeka we, ekivuddeko ennyonta y’omukwano okweyongera.
Masinde mu kiro ekikeseza olwa leero, alumbye mukyala we namutematema ku mutwe, omukono olubuto ssaako n’ebitundu ebirala.
Omukyala Ajambo wakati mu kulukusa maziga mu ddwaaliro Bishop Ceaser Asili, agambye nti abadde agezaako okudduka n’omwana omuto myezi 6, wabula bba amulondodde okumutematema okumutta era abatuuze, bebataasizza.
Ssentebbe w’ekyalo Elizephan Wagaba, agamba nti omukyala Ajambo okugyema okwegadaanga ne bba akawungeezi k’olunnaku olw’eggulo, y’emu ku nsonga lwaki omusajja yavudde mu mbeera okwagala okutta mukyala we.
Ssentebba Wagaba agamba nti omusajja yasindikirizza mukyala we okudda mu nnyumba, okwesa empiki, omukyala neyelema, omusajja kwekujjayo ejjambiya.
Eddoboozi lya Wagaba
Ku nsonga eyo, Isah Ssemwogerere omwogezi wa Poliisi mu bitundu bye Savannah agambye nti Poliisi etandiise okunoonya Masinde aliira ku nsiko mu kiseera kino ate ye omukyala Ajambo asindikiddwa mu ddwaaliro erya Kamira Health Center III.
