Uganda, ezudde abantu 35 nga balina Covid-19 ne baweza omugatte gw’abalwadde 557.
Olunnaku olw’eggulo, baakebedde abantu 2,267 nga ku balwadde abazuuliddwa 15 bagiddwa ku nsalo ate 20 mu bantu.
Ku baavudde ku nsalo nga baddereeva, 7 bagiddwa Elegu okuva mu South Sudan, 2 Busia okuva mu Kenya, 3 Malaba ne Oraba.
Mungeri y’emu 2 bakola ku byakwerinda ku nsalo y’e Elegu, ate omu ddereeva yavudde Gulu.
Ate 20, kiteeberezebwa nti obulwadde babugya ku baddereeva nga 7 batuuze mu Kampala, 5 Amuru, 3 Mayuge, 2 Kyotera, 1 Wakiso, 1 Dokolo ate n’omulala 1 Amolatar.
Okusinzira ku Charles Olaro nga y’avunaanyizibwa ku by’obujjanjabi mu Minisitule y’ebyobulamu, Uganda mu kiseera kino erina abantu 82, abasiibuddwa nga bawonye Kolona era akubiriza abantu okwongera okwekuuma.
