Poliisi mu disitulikiti y’e Kaliro ekutte omusomesa Timothy Mulindwa ow’essomo ly’okubala ku Happy Hours Primary School olw’okusomesa mu kiseera kino eky’okulwanyisa kolona.
Mulindwa atwaliddwa ku kitebe kya Poliisi e Kaliro.
Okusinzira ku Poliisi, Mulindwa alina banne abadduse akawungeezi k’olunnaku olw’eggulo nga bakitegeddeko nti Poliisi etuuse ku ssomero era baabadde basomesa abaana ekintu ekimenya amateeka olw’okugyemera ebiragiro by’omukulembeze w’eggwanga lino Yoweri Kaguta Museveni.
Ku Poliisi, Mulindwa yegaanye eby’okusomesa abayizi bw’ategeezezza nti yabadde abawa mpapula n’obutabo okubayambako mu kusoma kwabwe.
Mulindwa agamba nti abamu ku bayizi tebalina Ttiivi ate balemeddwa okufuna empapula za Gavumenti era y’emu ku nsonga lwaki babadde balina okubawa ebintu eby’enjawulo okubatangira okutayaaya ku kyalo.
Robert Tashobya, addumira Poliisi mu disitulikiti y’e Kaliro agambye nti Mulindwa bamutwala mu kkooti ku misango gy’okugyemera ebiragiro bya Pulezidenti Museveni.
