Ekiyongobero kibutikidde abatuuze ku kyalo Kabaya mu ggombolola y’e Nyarubuye mu disitulikiti y’e Kisoro, ssemaka bw’asangiddwa nga yeetugidde ku muti.
Ssemaka Mbarushimana Ponsiano myaka 50 asangiddwa abatuuze ng’alengejja ku muti era okwetta yasobodde okweyambisa omuguwa.
Okusinzira kw’omu ku batuuze agaanye okwatuukiriza amaanya ge, Ponsiano aludde ng’alina obutakaanya ne mukyala we nga kivudde ku nsonga ez’enjawulo omuli okulemwa okulabirira famire ye.
Mungeri y’emu omukyala yagaana bba okuddamu okusembeza omukono ku ssemateeka era kiteeberezebwa ennyonta y’omu kisenge, zezimu ku nsonga lwaki yesse.
Okusinzira ku mwogezi wa Poliisi mu bitundu bye Kigezi Elly Maate, Poliisi esobodde okwekebejja ekifo Ponsiano weyetugidde era omulambo gukwasiddwa abenganda okuziikibwa.
Mungeri y’emu avumiridde eky’abantu okwetta nga balowooza y’engeri yokka ey’okuvunuka ebizibu.
