Munnakisinde ki People Power Robert Kyagulanyi Ssentamu amanyikiddwa enyo nga Bobi Wine ettuntu lya leero yegasse n’abantu baakiikirira nebeyiwa ku nguudo mu bitundu by’e Lusanja, Kiteezi, Mpereerwe nebatandika okuleekaanya esseffuliya ng’akabonero akokusaba gavumenti emmere.
Bobi Wine agamba nti ye n’abalonzi be si bamativu n’engeri gavumenti gyesaasaanyizzaamu ssente ezagiweebwa okugulira abantu emmere era y’emu ku nsonga lwaki abadde alina okuvaayo okwetaba mu okuleekaanya esseffuliya.
Bobi Wine y’omu ku Bannayuganda abegwanyiza obukulembeze bw’eggwanga mu kulonda kwa 2021 okuggya Yoweri Kaguta Museveni mu buyinza era akola buli kimu, okutwala mukyala we Barbie Itungo Kyagulanyi mu State House.
Olunnaku olwaleero, wadde alina emmotoka ez’enjawulo nga ne Kabiite we Barbie alina emmotoka, atambudde ku byalo eby’enjawulo era obwedda emmotoka zimukuba enfuufu ng’ali n’abaloozi atambula, okulaga nti betaaga emmere mu Kyadondo East.
Ekikolwa eky’okukuba esseffuliya buli ssaawa 7 ez’emisana, kyalangiriddwa Dr. Kizza Besigye bwe yabadde ku mukolo mu disitulikiti y’e Wakiso aba People Goverment ne People Power kwe battidde omukago okwegatta mu kulonda kwa 2021 n’okusingira ddala ku kifo ky’obwa Pulezidenti.
