Alipoota ekwata ku byokulonda efulumiziddwa enkya ya leero, eraze nti ssentebbe w’ekibiina kya NRM Yoweri Kaguta Museveni akulembedde banne abegwanyiza obukulembeze bw’eggwanga.
Okunoonyereza kukoleddwa ekitongole ky’obwannakyewa ekya Research World International, okubuuza abantu, omuntu gwe bayinza okulonda ku bukulembeze bw’eggwanga singa okulonda kubadde kwa leero.
Mu Lipooti, Museveni afunye ebitundu 47 ku 100 ate Pulezidenti w’ekibiina ki NUP Robert Kyagulanyi Ssentamu amanyikiddwa nga Bobi Wine afunye ebitundu 22 ku 100.
Ate Dr. Kizza Besigye eyakavuganya ku bwa Pulezidenti emirundi 4 okutuusa 2016, afunye ebitundu 17 ku 100.
Okwebuuza ku bantu kwakoleddwa wakati w’omwezi Ogwokusatu n’okutuusa mu kiseera nga bannansi bali ku muggalo gwa Covid-19 era abantu 2,321 bebabuuziddwa mu bitundu by’eggwanga eby’enjawulo omuli Acholi, Teso, Lango, Busoga, Buganda, Sebei, Rwenzori, Ankole, Bukedi, Karamoja n’ebitundu ebirala.
Mu kiseera kino Mukulu Museveni ne Bobi Wine bategeeza dda nti bagenda kwesimbawo wabula Dr. Kizza Besigye tannaba kuvaayo ku nsonga eyo.
