Poliisi mu Kampala ekutte omusajja David Ssebulime Mayega nga bawusa ku misango gy’okutta muganzi we Cathy Nakate n’omwana we myaka 4, nga bali mu ssabo mu zzooni ya Ssekate e Kawempe.

Kigambibwa Ssebulime abadde ayagala Nakate okumala ebbanga era yabadde amututte mu ssabo, okumukolako afune emikisa ssaako n’okumwagala yekka ng’omusajja.

Nga bali mu ssabo, omusawo w’ekinnansi Simon Peter Ssemanda yasobodde okweyambisa amafuta aga petulooli na ag’ettaala, okukuuta ekifuba ky’omukyala okumala essaawa eziwera.

Kigambibwa omukyala yazimbye mu kifuba ate ng’ali mu mbeera mbi, ekyatabudde omusawo w’ekinnansi Ssemanda ssaako ne muganzi w’omukyala Ssebulime era bakaanyizza ne banyoola omukyala ensingo n’omwana, okutta obujjulizi.

Okusinzira ku mwogezi wa Poliisi mu ggwanga Fred Enanga, Omusajja Ssebulime akwattiddwa enkya ya leero nga kivudde ku batuuze okubatemyako era mu kiseera kino ali ku Poliisi y’e Kawempe ku misango gy’obutemu.