Ebitongole ebikuuma ddembe, bitandiise okunoonyereza ku basirikale baabwe abenyigidde mu kulya enguzi ne bakiriza abantu okusala ensalo mu nkukutu, ekyongedde okutambuza Covid-19.
Okusinzira ku mwogezi w’amaggye mu ggwanga Brigadier General Flavia Byekwaso, waliwo munnayuganda eyakomyewo okuva e Dubai nayingira mu Uganda ng’ayitidde ku nsalo ye Tanzania era bagenze okumwekebejja ng’alina Covid-19.
Brigadier General Byekwaso mu kwogerako eri bannamawulire ku Media Centre mu Kampala, agamba nti omusango guli ku bakuuma ddembe abali ku ddimu ly’okuuma ensalo abenyigidde mu kukusa abantu, ekintu ekimenya amateeka.
Agamba nti, ebitongole ebikuuma ddembe bitandiise okunoonyereza era omusirikale yenna anaakwatibwako, tewali kumuttira ku liiso wabula okuvunaanibwa.
