Entiisa ebuutikidde abatuuze ku kyalo Bunyora mu ggoombolola y’e Kamuli era mu disitulikiti y’e Kamuli, mutuuze munaabwe bw’attiddwa mu kiro, ekikeseza olwaleero.
Omulambo gwa Fred Kapere myaka 22 gusangiddwa emanju w’enju ye wakati mu kitaba ky’omusaayi.
Mu kwekebejja omulambo, gusangiddwako ebiwundu ku bulago n’omutwe, ebyamutuusiddwako abatemu.
Abatuuze wakati mu kulukusa amaziga, bawanjagidde Poliisi okunoonyereza abenyigidde mu kutta Kapere abadde omwana omuto ku myaka 22 ate nga muntu w’abantu.
Wabula okusinzira ku mwogezi wa Poliisi mu bitundu bye Busoga North Michael Kasadha, okunoonyereza kulaga nti Kapere baamuttidde mu kitundu kirala, omulambo ne baguleeta ne bagusuula emanju w’ennyumba.
Omulambo, gutwaliddwa mu ddwaaliro ekkulu e Kamuli okwekebejjebwa nga Poliisi bw’enoonyereza abatemu.
