Omubaka wa Palamenti mu ggwanga erya Ghana akubiddwa amasasi agamutiddewo enkya ya leero ku Lwokutaano bw’abadde ava mu Kampeyini.
Ekow Quansah Hayford owa Mfantseman Konsituwense, alumiddwa abasajja mukaaga (6) nga bonna bakutte emmundu.
Okusinzira ku batuuze aberabiddeko n’agaabwe, abatemu bagambye nti Hayford y’omu ku bizibu bya Ghana era amangu ddala akubiddwa amasasi 2.
Ddereeva wa Hayford naye akubiddwa essasi era atwaliddwa mu ddwaaliro okufuna obujanjabi.
Ghana yakulonda abakulembeze omuli ne Pulezidenti nga 7, December, 2020.
Wabula abakulembeze ab’enjawulo nga bakulembeddwamu Pulezidenti Nana Akufo-Addo bawanjagidde Poliisi okunoonyereza abatemu, abenyigidde mu kutta omubaka wa Palamenti.
