Omuyimbi Moses Ssali amanyikiddwa nga Bebe Cool ne mukyala we Zuena Kirema Ssali, baduukidde mu kkooti enkulu mu Kampala etawulula enkaayana nga bavunaana Martin Shafat Ssaku omusazi w’enviiri okusiiga erinnya lyabwe enziro.
Ssaku owa Mart barber hair studio ne Kampuni ya Mart Barber Group of Companies Limited, yatwaliddwa mu kkooti ku misango gy’okusiiga abantu enziro.
Bebe Cool ne mukyala we Zuena, nga bakulembeddwamu bannamateeka baabwe aba KSMO Advocates, bagamba nti SSaku omwezi oguwedde yali ku Ttiivi (TV), yategeeza nga Bebe Cool ne famire ye baludde nga abalongoosa mu kusala enviiri kyokka bakyagaanye okumuwa ssente ze.
Ssaku yategeeza nti abanja famire obukadde 3 kyokka balemeddwa okumusasula.
Mungeri y’emu Bebe Cool agamba nti Ssaku ng’ayita ku mikutu migatta bantu, yategeeza nti famire ye, terina busoobozi kwebezaawo wabula okutambulira mabanja naye nga bali mu mbeera mbi.
Mu kkooti, Bebe Cool ne mukyala we Zuena, Ssaku bamuguddeko emisango egy’enjawulo omuli okusiiga amaanya gaabwe enziro, okweyambisa ekifaananyi kya Zuena okulanga Saluuni ye nga takkiriziddwa, okulimba nga famire bw’ajibanja ssente obukadde 3 nga tabanja wadde 100.
Bebe Cool asabye kkooti, Ssaku okumusasula obukadde 200 olw’okusiiga famire enziro ne kkooti okulagira Ssaku okomya okweyambisa ekigambo kyokka ku famire ye.
Omuwandiisi wa kkooti enkulu, y’alindiriddwa okutegeeza Ssaku okuteekayo okwewozaako kwe n’okuteekawo ennaku, omusango okutandiika okuwulirwa.
