Poliisi y’e Soroti ekutte omusajja ku misango gy’okwefuula omukyala era abadde ali mu laavu n’abasajja ab’enjawulo.
Silver Jude Olaboro myaka 22 yakwattiddwa era Poliisi emutaasizza okuttibwa abatuuze.
Jude abadde ali mu laavu n’omusajja Pirwoth Osbert, omukozi mu Hotero ya Akello Hotel LTD mu kibuga kye Soroti okumala sabiti eziwera.
Omusajja Osbert abadde asindikira Jude ensimbi ssaako n’ebyokulya ng’amuyita mukyala we, okutuusa olunnaku olw’eggulo akawungeezi, webakaanyiza okusinda omukwano.
Nga batuuse mu loogi, Osbert eyabadde yesuunga okumatizza muganzi we mu nsonga z’omu kisenge, kyamubuseeko okuyisa omukono ng’akwata ku musajja munne.
Okusinzira ku mwogezi wa Poliisi mu bitundu bye East Kyoga David Ongom, Omusajja yakubye enduulu, eyasombodde abatuuze era Jude kaabuze kata okuttibwa.
Ku Poliisi, Jude agambye nti wadde musajja, alina abasajja ab’enjawulo ng’ali mu laavu nabo, abamusindikira ensimbi n’ebyokulya okwebezaawo.
Ongom agamba nti Jude aguddwako emisango gy’okwefuula omukyala era essaawa yonna bamutwala mu kkooti.
