Akwattidde NUP bendera okuvuganya ku bukulembeze bw’eggwanga lino Robert Kyagulanyi Ssentamu, abotodde ekyama lwaki yakwattiddwa okumulemesa okuba Kampeyini ze.
Kyagulanyi yakwattiddwa ku lunnaku Olwokusatu mu disitulikkiti y’e Luuka era mu kkomera e Nalufenya akulunguddeyo ennaku 2.
Akawungeezi ka leero, bw’asimbiddwa mu maaso g’omulamuzi wa kkooti esookerwako e Iganga Jessica Chemeri, Kyagulanyi aguddwako emisango gy’okugyemera ebiragiro bya Gavumenti ne Minisitule y’ebyobulamu eby’okulwanyisa Covid-19.
Kyagulanyi ayimbuddwa kakalu ka kkooti ka miriyoni emu etali yabuliwo ate abamweyimiridde okubadde omubaka we Jinja East Paul Mwiru ne John Baptist Nambeshe owe Manjiya, obukadde 5 buli omu.
Okumuyimbula, omulamuzi amutaddeko obukwakulizo obw’enjawulo omuli abantu bonna abagenda mu lukungana balina okwambala masiki, okunaaba mu ngalo nga bagenda okuyingira, okwewa amabanga, okwewala okutambula n’ekibinja ky’abantu nga bagenda mu lukungana ssaako n’okuvaayo ate okusisinkana abantu, talina kusukka ssaawa 12 ez’akawungeezi.
Omulamuzi ayongezaayo omusango okutuusa nga 18, omwezi ogujja ogwa December, 2020.
Wabula mu kkooti, Kyagulanyi agambye nti okwesimbawo okuggya mukulu Museveni mu ntebe n’okukyusa obukulembeze bwe, y’emu ku nsonga lwaki yakwattiddwa.
Eddoboozi lya Bobi Wine
