Poliisi ku Jinja Road ekutte omusajja Adome Jeremy myaka 36 ku misango gy’okubba ensimbi, ddoola za America 80,000 okuva ku Speke Apartments.
Jeremy akwattiddwa ku misango gy’okubba ebintu by’omukyala Sheila Nandege amanyikiddwa Nalongo Sheila Don Zella.
Don Zella agamba nti nga 6 omwezi oguwedde ogwa Desemba, yapangisa luumu ku Speke Apartments ku Wampewo avenue namba 107 ne 512 wabula ku ssekkukulu nga 25, omwezi oguwedde ogwa Desemba, bwe yali atambuddemu, yagenda okudda ng’ebintu bye bitwaliddwa.
Agamba nti omubbi, yatwala ebintu omuli emitwalo 9 egya ddoola, ssente obukadde 30, ebyokwewunda, amassimu 4, Camera ekika kya Nikon, paassipoota 8, Laptop 2 nga byonna biri mu bukadde bwa ssente 460.
Don Zella yaddukidde mu kkooti enkulu mu Kampala, okusaba abakulira Speke Apartments okumudiza ebintu bye mu nnaku 15 zokka oba okuggya mu kkooti okwewozaako.
Wabula amyuka omwogezi wa Poliisi mu Kampala n’emirirwano Luke Owoyesigyire agambye nti Poliisi yasobodde okweyambisa kkamera eziri ku Speke Apartments, okuzuula Jeremy eyakulembeddemu okuggya ebintu mu luumu ya Don Zella 107.
Jeremy bamukwatidde mu disitulikiti y’e Arua kyokka mu kwekebejja amakaage, musangiddwamu ebicupuli bya ddoola za America emitwalo (6) 60,000.
Mu kwewozaako, agambye nti ebicupuli bya ssente yabiggya mu luumu ya Don Zella.
Poliisi egamba nti wadde Jeremy wadde akwattiddwa, bakyanoonya banne abamuyambeko okumenya oluggi ssaako n’okuzuula amakkubo ku bicupuli bya ssente byasangiddwa nabyo.
