Omukyala Shamim Kyomuhendo addukidde mu kkooti enkulu mu Kampala okusaba Gavumenti n’ebitongole ebikuuma ddembe okuleeta bba munnakibiina kya NUP David Bwanika Lule amanyikiddwa nga Selector Davie nga mulamu oba nga mufu.
Kyomuhendo nga mutuuze mu zzooni y’omu Ddungu mu disitulikiti y’e Wakiso agamba nti bba yatwalibwa abasajja abatamanyiddwa nga bamuggya mu nju nga 12, omwezi guno ogwa Janwali, ku ssaawa nga 6 ez’ekiro.
Mu kkooti, akulembeddamu bannamateeka abegatira mu kibiina kyabwe ekya PACE Advocates era agambye nti Selector Davie okubuzibwawo okuva nga 12 omwezi guno, kikolwa, ekityoboola eddembe ly’obuntu.
Mungeri y’emu basabye kkooti, okuyisa ekiragiro eri akulira ekitongole kya ISO, omuduumizi wa Poliisi, ow’amaggye ssaako ne CMI okuleeta bba Davie mu kkooti.
Omusango, gukwasiddwa omulamuzi Emmanuel Baguma era yalindiriddwa okuwa olunnaku lw’okuwuliriza omusango ogwo.
Kinnajjukirwa nti mu nnaku 4 eziyise, waliwo ebyali biyitingana ku mikutu migatta bantu nti Davie kati z’embuyaga ezikunta ekyongedde okutiisa kabiite we Kyomuhendo n’okusalawo okuddukira mu kkooti.
