GIWUNYE! Bakutte bakkondo 9 abatigomya Bannakampala, babaggyeko ebyama ku Poliisi.
Poliisi y’e Katwe ekoze ekikwekweeto mu kiro ekikeseza olwaleero mwekwatidde abantu 9 abaludde nga benyigira mu kutigomya abatuuze mu bitundu bye Masajja, Makindye-Sabagabo mu disitulikiti y’e Wakiso.
Abakwattiddwa, bamanyikiddwa nga ‘Call Call’ nga bakubira amassimu nti bawangudde ebirabo ebyenjawulo kyokka oluvanyuma ne basaba abawangudde okubasindikira ssente mu ngeri y’okuba.
Mungeri y’emu baludde nga basindikira abantu mesegi ez’obulimba ku ssimu eza Mobile Money, oluvanyuma ne basaba gwe basindikidde Mesegi, okuzza ssente zaabwe.
Abakwatiddwa, bakulemberwamu Michael Kinalwa abadde yegumbulidde okubba abatuuze b’e Kosovo era basangiddwa n’ebintu ebyenjawulo omuli ebijjambiya, ttiivi, ebintu bya Gavumenti omuli jaketi y’amaggye ssaako n’ebintu ebirala.
Okusinzira kw’amyuka omwogezi wa Poliisi mu Kampala n’emirirwano Luke Owoyesigyire, bakuteko 9 era giwunye, bangi bakyaliira ku nsiko wabula Poliisi etandikiddewo okunoonyereza.
Agamba nti abakwate baludde nga balemesa Poliisi okukola emirimu gyabwe era bangi ku basirikale bakubiddwa.
Abamu ku batuuze b’e Wakiso bagamba nti ababbi ate nga bavubuka basukkiridde mu kitundu kyabwe nga batwala ebintu eby’enjawulo.
Abatuuze b’e Kosovo mu Wakiso bagamba nti bangi batya okutambula ku makya n’ekiro nga banyuse ku mirimu olw’okutya okutwala ebintu byabwe omuli okunyakula amassimu, ensawo z’abakyala, okukwata mu nsawo ne batwala ssente, okukuba abantu era bangi ku batuuze banyiga biwundu.
Bagamba nti Poliisi okuvaayo ne bakwata ababbi mu kitundu kyabwe, kigenda kuyamba nnyo abantu okufuna ku buwerero.
Ate abatuuze ku kyalo Nyakabungo mu ggoombolola y’e Kyanamira mu disitulikiti y’e Kabale baguddemu ekikangabwa omukyala ng’abadde mulwadde wa Mutwe ky’oyinza okuyita nti mulala bw’attiddwa oluvanyuma lw’okusobezebwako.
Omukyala ono, ali mu gy’obukulu 50 ng’abadde amanyikiddwa nga Norah, yattiddwa era bagenze okumwekebejja nga bamunyodde ensingo.
Abatuuze bagamba nti abatemu, kirabika batuuze ku kitundu nga y’emu ku nsonga lwaki Norah attiddwa olw’okutya okubalonkoma.
Mungeri y’emu bewunyiza, omutemu akikoze okudda ku mukyala omulala, okwerigomba naye, ate oluvanyuma namutta.
Wabula addumira Poliisi mu disitulikiti y’e Kabale Brian Ampaire agambye nti omulambo gw’omukyala gusangiddwako enkwagulo ku bulago ssaako n’emikwano nga ne mu kayumba ke, mulimu ensitaano eyabaddewo mu kusobezebwako n’okuttibwa.
Poliisi esuubiza nti okunoonyereza kutandikiddewo.
