Kyaddaki Poliisi ekutte Takisi e Mukono, eraze ekiddako mu bukambwe.
Poliisi y’e Mukono ekutte emmotoka ya Takisi namba UAP 841C Toyota Hiace olw’abantu abasukkiridde okwemulugunya.
ASP Luke Owoyesigyire, amyuka omwogezi wa Poliisi mu Kampala n’emirirwano agamba nti Poliisi efunye alipoota ez’enjawulo okuva mu bantu ab’enjawulo nti emmotoka ebadde yeyambisibwa mu kubba abatuuze nga befudde abasabaza abantu mu disitulikitim y’e Mukono.
ASP Owoyesigyire agamba nti emmotoka etwaliddwa ku Poliisi y’e Mokono era asabye abatuuze bonna abalina okwemulugunya ku mmotoka ekwattiddwa, okuvaayo okuwa Poliisi amawulire, kiyambeko abakwate okutwalibwa mu mbuga z’amateeka mu bwangu.
Ate Poliisi y’e Kyotera ekutte abantu basatu (3) okuva mu famire emu omuli n’omusuubuzi mu Tawuni Kanso y’e Mutukula ku misango gy’okuwamba omwana myaka 2 ne basaba ssente obukadde 80.
Omusuubuzi Sulaiti Mugabi, akwattiddwa ne nnyina ssaako ne mulamu we.
Kigambibwa Mugabi yakulembeddemu olukwe lw’okuwamba omwana n’okusaba ssente okuva mu bazadde okusobola okutumbula emirimu gye.
ASP Muhammad Nsubuga, omwogezi wa Poliisi mu bitundu bya Masaka, akakasiza okukwatibwa kwabwe era agambye nti bonna batwaliddwa ku kitebe kya Poliisi e Kyotera okuyambako Poliisi mu kunoonyereza.
Bills Kiiza Kato yawambibwa okuva mu bazadde be ku kyalo Kabawo mu Tawuni Kanso y’e Mutukula ku Ssande sabiiti ewedde abantu abatamanyiddwa.
Poliisi nga yegatiddwako akakiiko akalwanyisa obuli bw’enguzi mu offiisi y’omukulembeze w’eggwanga kakutte abantu babiri (2) ku misango gy’okweyita kye batali n’okuggyako abantu ensimbi.
Abakwate kuliko Lawrence Begumisa ne Ronald Rwabahangi abaludde nga bagyako abantu ensimbi omuli okubasuubiza okubatwala eri omukulembeze w’eggwanga Yoweri Kaguta Museveni, okwanjulayo ensonga zaabwe.
Poliisi egamba nti abakwate, baliko omukyala gwe bagyeko ssente obukadde 3 nga bamusuubiza okumutwala mu kakiiko, akalwanyisa obuli bw’enguzi mu offiisi y’omukulembeze w’eggwanga ssaako n’okufuna omukisa okusisinkana Pulezidenti Museveni okumwanjulira ensonga ze.
Asp Luke Owoyesigyire, amyuka omwogezi wa Poliisi mu Kampala n’emirirwano, agamba nti abakwate balina akabinja k’abantu, abaliira ku nsiko mu kiseera kino wabula okunoonyereza kutandikiddewo.
