Wuuno omukyala w’olubuto asindikiddwa mu kkomera lwa nguzi, eza paasipoota zimulakidde, bamututte akaaba.
Omukozi mu kitongole ekivunaanyizibwa ku bayingira n’okufuluma eggwanga mu Minisitule y’ensonga z’omunda mu ggwanga asindikiddwa ku limanda, ku misango gy’okugyako abantu ensimbi, okusobola okukola ku nsonga zaabwe.
Jesca Kalenge asimbiddwa mu kkooti y’omulamuzi esookerwako e Nakawa Ponsiano Odwori.
Okusinzira ku ludda oluwaabi, nga 12, March, 2021, ku kitebe kya Minisitule y’ensonga z’omunda mu ggwanga, Kalenge yasaba omu ku bannayuganda Yonah Mugoya abetaaga paasipoota emitwalo 35 okumukolera ku nsonga ze.
Mu kkooti, Kalenge yegaanye emisango gyonna era ng’ayita mu munnamateeka we Gordon Kifudde asabye okweyimirirwa kuba mukyala muzadde alina abaana abato babiri (2) ate essaawa yonna agenda kuzaala.
Wadde Kalenge aleese abajjulizi babiri (2) omuli bba era omukozi mu minisitule y’ensonga z’omunda mu ggwanga Mark Bwire ssaako ne Kojjaawe Fahad Isabirye, omusomesa ku Gombe Secondary School, oludda oluwaabi nga lukulembeddwamu Barbara Kyomugisha, lugobye okusaba kwe nga singa ayimbulwa, ayinza okutaataganya okunoonyereza.
Omulamuzi Odwori akiriziganyiza n’oludda oluwaabi nti ayinza okutaataganya okunoonyereza era Kalenge asindikiddwa ku Limanda mu kkomera e Kigo okutuusa nga 8, April, 2021.
Kigambibwa, akakiiko akali ku ddimu ly’okulwanyisa obuli bw’enguzi okuva mu offiisi y’omukulembeze w’eggwanga, kakwata Kalenge sabiiti ewedde.
Mu Kampala, Poliisi ekutte omusajja agambibwa nti musomesa ku misango gy’okusangibwa n’ebigezo by’abayizi ba P7 ebyakamalirizo Primary Leaving Examination-PLE.
Okusinzira kw’amyuka omwogezi wa Poliisi mu Kampala n’emirirwano Luke Owoyesigyire, omukwate ye Edward Lubale okuva mu disitulikiti y’e Buikwe wabula yabadde asindikiddwa mu disitulikiti y’e Wakiso mu Monisipaali y’e Kira okukuuma ebigezo.
Lubale yasangiddwa ku ssomero lya Little-Lina primary school mu bitundu bye Kyaliwajjala n’ebibuuzo era waliwo omu ku batuuze eyamulabye, kwekutemya ku poliisi.
Owoyesigyire agamba nti Lubale aguddwako emisango gy’okwenyigira mu kubba ebigezo era okunoonyereza kutandikiddewo.
Poliisi egamba nti egenda kweyambisa ebigezo ebikoleddwa abayizi ebikomekerezebwa olwaleero ku Lwokusatu era singa kizuulibwa nti tewali njawulo n’ebyo ebikwatiddwa ne Lubale, tewali kumuttira ku liiso, bagenda kumutwala mu kkooti.
Ebirala mulimu https://www.facebook.com/GalaxyFm1002/videos/477993229899708
