Owa S4 alese abazadde nga bali mu maziga attiddwa mu bukambwe!
Poliisi mu disitulikiti y’e Rukungiri etandiise okunoonyereza ku kyavuddeko omuyizi wa S4 ku Rukungiri High School okufa nga wasigadde ssaawa bussaawa okutuula ekigezo kye ekisembayo nga 1, April, 2021.
Omulambo gwa Brenda Ankunda gwasangiddwa mu mwala gwe Kahengye ku Lwokusatu.
Akunda yasindikiddwa okudda awaka oluvanyuma lw’ekigezo kya Agriculture ng’alina okudda okutuula ekigezo kya Literature ku Lwokuna era kigambibwa awaka yavuddeyo ku Mmande.
Akulira abasomesa Robert Mbasa agamba nti ku Lwokuna, Ankunda bamulinze okutuusa ssaawa 5 ez’okumakya nga talabikako, kwe kutegeeza bazadde be, abatuuze mu ggoombolola y’e Bugangari.
Famire ya Ankunda egamba nti yagenze ku Poliisi okugitegeezaako ku kya muwala waabwe okubula wabula Poliisi yegenze okubalaga omulambo gw’omukyala oguzuuliddwa mu mwala nga gwa muwala waabwe kyokka alese yasuubiza abazadde okufuna Ist Grade.
Poliisi egamba nti omulambo guli mu ddwaaliro lya Rwakabengo Health Centre III okwekebejjebwa okuzuula ekituufu ekyavuddeko omwana okufa.
Ate Poliisi y’e Agago ekutte omusajja myaka 32 ku misango gy’okutta nnyina ali mu gy’obukulu 71.
Omukwate ye Daniel Odera, omutuuze we Bunga mu muluka lwe Atut mu ggombolola y’e Kuywee.
Kigambibwa Odera yasambye Nnyina Theresa Amony mu lubuto akawungeezi k’olunnaku Olwokusatu.
Okusinzira ku Aldo Otto, omusirikale ku Poliisi y’e Kalongo, Odera abadde alumiriza nnyina Theresa okumulemesa omukyala gwayagala, ekyavuddeko obutakaanya.
Maama Theresa yasangiddwa mu nnyumba ng’afudde oluvanyuma lw’okulumizibwa mu lubuto.
Jimmy Patrick Okema, omwogezi wa Poliisi mu bitundu bya Aswa agamba nti Poliisi ekutte Odera ne muganzi we Grace Atim myaka 27 era bali ku Poliisi y’e Kalongo, okuyambako mu kunoonyereza.
Mungeri y’emu Poliisi y’e Luweero ekutte ssemaka ssaako ne Mukyala we ku misango gy’okubba omwana omuwala Namazzi Kisaakye myaka 3.
Kisaakye yabuzibwawo okuva mu maka, ga bazadde be ku kyalo Nsozibirye mu ggombolola y’e Luweero nga 25, March, 2021.
Wabula abazadde ssako abatuuze nga begatiddwako Poliisi oluvanyuma lw’okunoonyereza, omwana asangiddwa ku kyalo Kibanvu mu Tawuni Kanso y’e Luweero mu luggya ng’ali kuzannya ne banne.
Maama Hadijja Nabaggala ne bba John Katumba basabye Poliisi okunoonyereza lwaki omwana yali atwaliddwa.
Omuddumizi wa Poliisi e Luweero Abraham Tukundane, agambye nti Poliisi etandiise okunoonyereza kyokka agaanye okwatuukiriza amannya g’abantu abakwattiddwa.
