Pulezidenti w’ekibiina ki National Unity Platform (NUP) Robert Kyagulanyi Ssentamu (Bobi Wine) alangiridde okuddayo mu kkooti ku kye mmotoka ye, eyatwalibwa ekitongole ekisolooza omusolo mu ggwanga ki Uganda Revenue Authority (URA) okuddamu okwekebejjebwa.
Emmotoka eno, ekika kya Toyota Land Cruiser V8 nnamba UBJ 667F egambibwa nti teyitamu masasi, yatwalibwa nga 9 omwezi guno Ogwokuna ne baddamu okugyekebejja nga 12 era omwezi guno, Ogwokuna, nga mu kugipima, yazuulibwa nti erina kkiro 5000.
Mu kugyekebejja, URA yegatibwako ebitongole ebikuuma ddembe omuli Uganda People’s Defence Force (UPDF) ssako ne Special Forces Command (SFC) okuzuula, omusolo omutuufu ogugigwanidde.
Wabula bannamateeka ba Kyagulanyi nga bakulembeddwamu Anthony Wameli, bagamba nti URA ekyagaanye okubaddamu ku mmotoka eyatwalibwa okumanya kye bayinza okuzaako.
Wameli agamba nti ennaku ziweze 10 nga tebadibwamu nga balina kuddayo mu kkooti, omulamuzi okusalawo ku mmotoka eyatwalibwa.
Wameli agamba nti kituufu, bazuula nti emmotoka eri ku mutindo gwa nsi yonna, teyitamu masasi.
Mungeri y’emu asambaze ebyogerwa nti mu sseemateeka wa Uganda, mulimu ebikugira omuntu wa buligyo okuvuga emmotoka, etayitamu masasi.
Wameli agamba nti buli muntu alina obusoobozi, waddembe okufuna emmotoka gye yetaaga mu ngeri y’okwekuuma.
Kigambibwa Kyagulanyi yatuukiriza ebisaanyizo byonna era yasasula omusolo gwa 88,612,027 kyokka aba URA bagamba nti omusolo ogwagibalirirwa guli wansi nnyo ku ze yalina okusasula.
Eno yayita ku nsalo ya Uganda ne Kenya era yajjira ku ttaka ng’eriko nnamba za Kenya, KCY 550X era nnamba ya “Logbook” y’emmotoka ng’eri K3323207K era Fauz yasooka kusasula omusolo gw’okugivugira ku nguudo za Uganda.
Okusinzira ku Bukedde, aba URA beebuuza ku ba Interpol era nga January 6, 2021 ne baweereza ebbaluwa eraga nti emmotoka terina buzibu era URA n’ekolera ku bbaluwa eno okukkiriza empapula ezaaweebwayo Fauz.
Empapula zaakolwako nga January 8, 2021 era ne ziyisibwa nga January 12, 2021.
Fauz bwe yafuna empapula ezirambika obwannannyini bw’emmotoka eno era ng’afunye n’ennamba yaayo, yateekayo empapula endala ezikyusa obwannannyini, ng’emmotoka eva mu mannya ga Fauz Khalid ng’edda mu mannya ga Robert Kyagulanyi Ssentamu.
Oluvannyuma yatwalibwa ewa Kyagulanyi era n’agyanjulira abawagizi be nga February 21, 2021 mbu teyitamu masasi.
