Kyaddaki emmundu eyakozeseddwa okulumba eyali omuddumizi w’amagye mu ggwanga Gen. Katumba Wamala ezuuliddwa, ekyongedde okuwa essuubi okuzuula abatemu.

Gen Katumba yalumbiddwa abatemu ku Lwokubiri ku makya nga 1, June, 2021, e Kisaasi ku luguudo lwe Kisota era muwala we Brenda Nantongo yattiddwa ne ddereeva we Haruna Kayondo.
Gen Katumba wadde yasimatuse okuttibwa, yakubiddwa amasasi mu mikono ate omukuumi we Sgt. Khalid Koboyoit teyafunye buzibu bwonna.

Wabula ssentebe w’ekibiina ki National Resistance Movement (NRM) era omukulembeze w’eggwanga lino Yoweri Kaguta Museveni agumizza eggwanga ku ky’okunoonya abatemu abaakoze obulumbaganyi ku Gen. Katumba.

Pulezidenti Museveni bwe yabadde ayogerako eri eggwanga akawungeezi k’olunnaku Olwokutaano mu kisaawe e Kololo, yagambye nti ensonga y’okunoonya abatemu abyekwatiddemu.
Agamba nti emmundu eyakozeseddwa okulumba Gen. Katumba y’emu eyakozesebwa okulumba n’okutta Maj. Muhammad Kiggundu.

Maj. Kiggundu yattibwa e Masanafu mu Kampala n’omukuumi we Sgt. Steven Mukasa mu 2016.

Eddoboozi lya Museveni

Pulezidenti Museveni ku Poliisi
Pulezidenti Museveni alagidde ekitongole ekya Poliisi okuddamu mu bwangu okweyambisa ‘Radio Calls’ mu mpuliziganya okusinga okweyambisa amassimu.
Museveni agamba nti Gen. Kale Kayihura yaggyawo Radio Call mu kiseera nga yakulira ekitongole ekya Poliisi ate nga zaali zikola bulungi mu kiseera kya Gen. Katumba bwe yali akulira Poliisi.

Museveni agamba nti Radio Call ziyambako okukola obulungi omulimu okusinga okweyambisa amassimu.
Agamba Radio Call ziyamba mu kukuba enduulu eri abasirikale ab’enjawulo ate mu kiseera kye kimu okusinga amassimu.

Ate ku nsonga y’okweyambisa kkamera, Museveni agamba nti wadde kkamera ziyambako okulaba omulabe, abasirikale abatuula ku kkamera balina okukola omulimu ogw’enjawulo.
Museveni anokoddeyo eky’okulumba Gen. Katumba, agamba kkamera zakola omulimu gwazo okukwata abatemu kyokka abasirikale abaali balina okuyambako abatemu okukwatibwa nga tebannakola bulumbaganyi baali ku byabwe.

Ebirala ebifa mu ggwanga – https://www.facebook.com/GalaxyFm1002/videos/944704223043902