Bannamateeka babasibe, omubaka we Kawempe North Muhammad Ssegirinya ne Allan Ssewanyana owa Makindye west, tebalabiseeko mu kkooti esookerwako e Masaka, olunnaku olwaleero.
Ssegirinya ne Ssewanyana nga bali ku misango musanvu (7) omuli egy’obutemu, obutujju, okuwagira ebikolwa eby’ekitujju, okwagala okutta abantu mu kitta bantu ekyali e Masaka wakati w’omwezi Ogwomusanvu N’ogwomunaana, 2021, era enkya ya leero, babadde balindiriddwa mu kkooti e Masaka, okuddamu okubasomera emisango gyabwe.
Wabula bannamateeka baabwe okuli omuloodi wa Kampala Ssalongo Erias Lukwago, omubaka omukyala owa Kampala Shamim Malende ne Musa Matovu, bonna tebalabiseeko mu kkooti era tewali nsonga yonna eweereddwa.
Wadde mu kkooti tebalabiseeko, oludda oluwaabi nga lukulembeddwamu Richard Birivumbuka, lusabye omulamuzi Christine Nantege okwongezaayo emisango gyabwe nti okunoonyereza kukyagenda mu maaso.
Omulamuzi Nantege akkiriza okusaba kw’oludda oluwaabi era omusango gwongezeddwayo okutuusa nga 10, omwezi ogujja ogwa November, 2021.
Omulamuzi Nantege oluvudde mu kkooti, omulamuzi Grace Wakooli naye ayingidde kkooti y’emu, era ayongezaayo emisango gyabwe emirala egy’obutemu, okutuusa ku lunnaku lwe lumu nga 10, omwezi ogujja ogwa November, 2021.
Kinnajjukirwa nti mu kitta bantu ekyali e Masaka, abantu 26 battibwa.
Wabula mu kkooti, Ssewanyanya asabye abalamuzi okutaasibwa kuba alumwa nnyo mu bitundu by’ekyama oluvanyuma lw’okukubwa.
Agamba nti yetaaga obujanjabi ate mu bwangu kuba obulumi busukkiridde.
