Entiisa ebuutikidde abatuuze ku kyalo Nanseko mu ggoombolola y’e Mabindo mu disitulikiti y’e Ssembabule, omusajja Kizito Ssemyalo omutemi w’embizzi, bw’attiddwa.
Kigambibwa Ssemyalo, yasigula muk’omusajja, ategerekeseeko erya Sserugo nga yamuwa ennyama y’embizzi omuli n’amatu, okukyusa omutima gwe.
Wabula Joseph Ssenyondo, omu ku batuuze agamba nti mu kiro ekikeseza leero ku Mmande, yawulidde omuntu eyabadde akuba emiranga ssaako n’okusaba obuyambi, era yagenze okuvaayo okutaasa nga Sserugo ali ne mukwano gwe Pasikale bali ku mugenzi bakuba emiggo.
Ssenyondo agamba nti naye yawonye okuttibwa, nga yakubiddwa omuggo ku bitundu by’ekyama n’omutwe era asangiddwa mu ddwaaliro ekkulu e Sembabule, ng’ali maziga.
Agamba Sserugo ne Pasikale badduse olw’okutya abatuuze okubatta nga bazze okuyamba.
Ate ssentebe w’ekyalo Paul Kabano, avumiridde eky’okutta omutuuze olw’ensonga z’omukyala.
Awanjagidde abatuuze, okwewala okutwalira amateeka mu ngalo wabula okweyambisa abakulembeze ku byalo, okumalawo obutabanguko mu maka.
Okusinzira ku mwogezi wa Poliisi mu bendobendo ly’e Masaka Muhammad Nsubuga, Sserugo akwattiddwa ku misango gy’okutta omuntu era essaawa yonna wakutwalibwa mu kkooti oluvanyuma lw’okunoonyereza.
Mungeri y’emu agamba nti Poliisi ekyanoonya omukyala, agambibwa okuvaako obuzibu ssaako Pasikale, eyasobodde okuyambako Sserugo, okutta omuntu.
