Omulamuzi wa kkooti enkulu mu Kampala Musa Ssekaana alagidde ebitongole ebikuuma ddembe, okuleeta mu koooti omuwandiisi w’ebitabo Kakwenza Rukirabashaija eyakwatibwa ku misango gy’okuvuma.
Kakwenza ali ku misango gy’okuvuma ssentebe w’ekibiina ki National Resistance Movement (NRM) era omukulembeze w’eggwanga lino Yoweri Kaguta Museveni ssaako ne mutabani we era omuddumizi w’eggye ly’okuttaka Lieutenant general Muhoozi Kainerugaba era bukya akwattibwa, zigenda mu sabiiti 2 ng’ali mikono gy’ebitongole ebikuuma ddembe.
Poliisi egamba nti nga 24, Desemba, 2021 yavuma Pulezidenti Museveni ate nga 26, Desembe, 2021 yavuma Gen Muhoozi ku mukutu ogwa Twitter era ali ku misango gy’okuvuma abantu.
Kakwenza myaka 33 nga mutuuze we Kisasi mu Divizoni y’e Nakawa era yakwattibwa nga 28, Desemba, 2021.
Wabula mu kkooti akawungeezi ka leero, Omulamuzi Ssekaana alagidde ku Lwokusatu, nga 12, omwezi guno ogwa Janwali 2022, omukwate okuleetebwa mu kkooti mu mbeera yonna gy’alimu.
Bannamateeka nga bakulembeddwamu Ronald Samuel Wadda, balina essuubi nti ku mulundi guno, ebitongole ebikuuma ddembe, byakuteeka mu nkola ekiragiro kya kkooti.
Wadda agamba nti bafunye amawulire nti Kakwenza ali mu mikono gy’amaggye egya Special Forces Command (SFC) Entebe era alina essuubi nti ku Lwokusatu balina okumuleeta mu kkooti.
Sabiiti ewedde, omulamuzi wa kkooti esookerwako e Makindye Irene Nambatya yalagira ebitongole by’okwerinda okuyimbula Kakwenza, wabula n’okutuusa kati, Kakwenza akyali mikono gyabwe, ekyongedde okutabula bannamateeka ku nsonga y’okutyoboola eddembe ly’obuntu.
Ebirala ebifa mu ggwanga – https://www.youtube.com/watch?v=36yfUN7TduI
